Nýggj nevnd varð vald á árliga aðalfundinum hjá Reyða Krossi Føroya í dag. Nakað av fólki møtti upp til fundin, sum varð hildin í høvuðsbygninginum hjá Reyða Krossi í Stiðjagøtu 6 í Havn.
Nevndin hevur skipað seg soleiðis:
Jóannes Eidesgaard, formaður,
Torfinn Højgaard, næstformaður,
Mary-Ann Thomsen, kassameistari,
Fía Niclasen, nevndarlimur,
Tommy Petersen, nevndarlimur,
Eyrith Guttesen Leyni, tiltakslimur,
Tórgerð Jallgrímsdóttir, tiltakslimur.
Ársfrágreiðingin varð løgd fram á fundinum. Greitt varð frá nógva og ymiska virkseminum hjá Reyða Krossi um alt landið. Síðan varð roknskapurin fyri árið í fjør lagt fram. At enda varð lagt fram, hvørji hjálparátøk úti í heimi Reyði Krossur hevur latið pening til í 2024. Les ársfrágreiðingina her.
Harumframt gjørdi nevndin av – beint fyri fundin – at lata 500.000 krónur í neyðhjálp til Myanmar beinavegin.
Myanmar varð rakt av ógvusligum jarðskjálvta fyrradagin, tann 28. mars, og framvegis liggja børn og vaksin fangað undir húsaleivdum. Fleiri enn 1.600 fólk hava latið lív í skjálvtanum. Tað hevur tískil alstóran týdning, at neyðhjálpin kemur fram sum skjótast.
