Familjuvinir

Reyði Krossur ynskir at veita tilfluttum útlendskum familjum ella einstaklingum møguleika at koma í samband við føroyskar familjur ella einstaklingar. Royndir úr øðrum londum vísa, at tilflytarar fella skjótari til í nýggja heimlandinum, læra mál og mentan skjótari, støðast og trívast betur, um tey megna at skapa sær eitt netverk. Reyði Krossur ynskir at vera viðvirkandi til at  tilfluttar familjur ella einstaklingar, ið lítið ella onki tilknýti hava til Føroyar, fáa so góða byrjan í nýggja landinum sum gjørligt. Tí sóknast vit nú eftir familjum ella einstaklingum ið hava hug at gera mun fyri eina tilflutta familju ella einstakling.

Tað kunnu vera ymsar orsøkir til at familjur ella instaklingar velja at flyta úr sínum heimlandi til eitt fremmand ókent land. Tað kann vera ringt at fella til og skapa sær nýtt netverk í einum landi, har ein ikki dugir málið, ikki kennir mentanina, ikki skilir óskrivaðu reglar og har ein einki bakland hevur. Reyði Krossur ynskir at skipa fyri, at sjálvbodnar føroyskar familjur ella einstaklingar fáa møguleika at taka hánd um, hjálpa og stuðla tilflytarum at skapa sær sosial sambond.

Hugskot til hvat tit kunnu gera tá tit hittast

  • Venja føroyska málið t.d. gera skúlating.
  • Hyggja ella lurtað eftir føroyskum sendingum.
  • Lesa bløð og bøkur saman.
  • Ganga túrar og tosað um nærumhvørvið.
  • Tosað um okkara ymisku mentanir og siðvenjur
  • Fara til ymisk frítíðarítriv ella tiltøk.
  • Fara túr í hagan ella til útróðrar.
  • Tosað um gerandis avbjóðingar og hendingar.
  • Gera mat og eta saman.
  • Gera bindiklubbar ella ítrivsklubbar.
  • Fara túrar og útferðir. T.d. á søvn, til søgulig støð, runt í býnum ella til handils.
  • Drekka ein kaffimunn og práta.