Vit fylla 100 ár og tað fara vit í Reyða Krossi Føroya at hátíðarhalda – alt árið!
Tú kanst tí vænta at síggja nógv til okkara upp á ymsar mátar í ár. Millum annað kanst tú gleða teg til í heyst, tá vit skipa fyri stórari Landsinnsavning, ið verður send í Kringvarpinum.
Reyði Krossur Føroya varð stovnaður 2. apríl í 1926, tá tað vísti seg at vera tørvur á sjálvbodnari orku at veita veikum í samfelagnum hjálp og kunning av ymsum slag – serliga innan heilsu.
Nógv er broytt hesi hundrað árini, men tørvurin á hjálp og sjálvbodnari orku er framvegis stórur og virksemið her í Føroyum er nógv vaksið seinastu árini.
Vit í Reyða Krossi Føroya er partur av í heimsins størsta hjálparfelagsskapi við umleið 17 milliónum sjálvbodnum í so at siga øllum londum í heiminum.
Í hundrað ár hava vit arbeitt við menniskjanum í miðdeplinum. Og tað er vert at hátíðarhalda❤️
