Um sálarlig fyrstuhjálparskeið
Grundað á drúgvar royndir og úrslit frá áralangari gransking, hevur Altjóða Reyði Krossur ment skeið í sálarligari fyrstuhjálp. Skeiðini, sum Reyði Krossur Føroya bjóðar út, byggja á henda leist hjá Altjóða Reyða Krossi.
Hvørjum eru skeiðini ætlað?
Reyði Krossur bjóðar skeið í sálarligari fyrstuhjálp til øll áhugað - uttan mun til útbúgving og royndir.
Skeiðini eru viðkomandi fyri bæði einstaklingar, stovnar og arbeiðspláss, sum ynskja at økja um mótstøðuførið og at tryggja sær førleikar at hjálpa sær sjálvum og øðrum, um ein kreppa rakar.
Nær er sálarlig fyrstahjálp góð at duga?
Nøkur dømi um, nær sálarlig fyrstahjálp er góð at duga eru: tá ein ólukka hendir, tá onkur er fyri harðskapi, fær staðfest álvarsliga sjúku ella fer á húsagang, tá ein av teim nærmastu letur lív, tá stórar vanlukkur raka, ella tá vit eru vitni til eina álvarsliga hending.