ADVENTSGÁVA IÐ KANN BJARGA LÍVUM
Manglar tær eina gávu til ein av tínum kæru? Í komandi viku skipar Reyði Krossur fyri almennum skeiðum í fyrstuhjálp, sum øll kunnu tekna seg til.
Undirvísingin fer fram í Stiðjagøtu 6, Tórshavn. Les meir um innihald, prís og annað á redcross.fo/fyrstahjalp/ og tekna teg, ella ein tú kennir, við at skriva til fyrstahjalp@redcross.fo.
Nú ber til at søkja um jólahjálp frá Í Menniskjum Góður Tokki ❤️
Aftur í ár samstarvar Reyði Krossur við Barnabata um at hjálpa fíggjarliga sperdum barnafamiljum á jólum ⛄️
Umsóknarfreistin er 7. desember, og umsóknarblaðið finnur tú á www.barnabati.foNÚ KUNNU FÍGGJARLIGA SPERDAR BARNAFAMILJUR SØKJA UM JÓLAHJÁLP
Umsóknarblaðið liggur á heimasíðuni hjá Barnabata. Seinasta freist at søkja er 7.des.
www.barnabati.fo
Hjálp til neyðstødd børn í Myanmar ❤️
Samanbrestir ímillum vápnaðar bólkar, yvirflóð og trupul atkomuviðurskifti gera ta longu sváru humaniteru støðuna í Myanmar enn verri. Fleiri enn 2 mió. menniskjur eru rikin frá húsi og heimi. Umleið 40% av teimum eru børn, sum nú noyðast at búgva í yvirfyltum legum, í frumskóginum ella í øðrum improviseraðum skjólum. Heimleysar familjur liva undir sera ótryggum viðurskiftum og stríðast fyri at fáa mest grundleggjandi tørvir á reinum vatni, mati, heilsu- og reinførisviðurskiftum, nøktaðar. Hendan støðuga strongdin og óttin hava ógvusligar fylgjur við sær, bæði fyri kropp og sinn, og serliga er sálarheilsan hjá børnum og ungum í vanda.
Hóast trygdar- og atkomuavbjóðingar, hjálpir Reyði Krossur í Myanmar fleiri hundraðtúsund útsettum børnum og familjum.
Reyði Krossur Føroya hevur nú, við stuðli frá Føroya Landsstýri, latið 500.000 kr. til at styrkja arbeiðið at betra um sálarheilsuna hjá neyðstøddum í Myanmar. Serliga fara pengarnir til at styrkja førleikarnar hjá Reyða Krossi í Myanmar at veita sálarliga fyrstuhjálp til børn og ung, umframt at seta á stovn barnavinarlig rúm (child-friendly safe spaces) í neyðstøðum.
Reyði Krossur í Myanmar arbeiðir eisini við at fáa barnavinarlig rúm í lag til heimleysar familjur í illa atkomuligum økjum. Har fara sjálvboðin at skipa fyri ymsum frítíðarvirksemi til ymsar aldursbólkar – tað verða stuttlig og mennandi frítíðarítriv, eitt nú ítróttur, spøl, list, handverk, eins væl og virksemi, sum stuðlar undir sjálvbjargni og lívsførleikum hjá børnunum.
Støðan í landinum hevur verið alsamt versnandi seinastu vikurnar, og Reyði Krossur í Myanmar fegnast um stuðulin úr Føroyum, sum tey siga hjálpir teimum í arbeiðinum “at tryggja framtíðina fyri børnini í Myanmar”.
FRAMÚR VÆLEYDNAÐ OPIÐ HÚS
Hjartans tøkk til allar stuðlar, øll vitjandi, allar tónleikarar og ikki minst takk til øll sjálvboðin, sum vóru við til at gera tiltakið Opið Hús hjá Reyða Krossi so sera væl eydnað aftur í ár ⛑
Nógv fólk løgdu leiðina framvið. Innihaldið á degnum var bæði lætt og meira álvarsamt - men mest av øllum hugnaligt 🥰☕
Gongur tú nú og hugsar um at tekna teg sum lim, ella hevur tú hug at vera sjálvboðin? Tú kanst tekna teg á heimasíðu okkara 👉 redcross.fo.
